O le Aso Gafua a sau o le a iloilo ai e le faamasinoga maualuga se talosaga a le loia susuga Unasa Iuni Sapolu o loo tulai mo Lema’i Faioso Sione o le taofia loa lea o le faaauauina o suesuega a le faamasinoga poo le Stay of Prosecution i le moliaga lea o le fafau o se gaioiga e tagatavale ai lē sa avea ma Palemia o le atunuu.
Na faailoa e le Loia i le faamasinoga i le amataga o le vaiaso o loo iai foi se tusi saisai na poloaiaina e le faamasinoga e pueina ma taofia ai le tagata lona tolu o loo tuuaia i lea moliaga tau solitulafono o ia lea o Talalelei Pauga.
O le taimi nei o loo tālia taualumaga tau faamasinoga i Ausetalia e faamautu ai le aumai faapagota o Talalelei e tali i le moliaga o le fafau lea o se gaioiga e tagata vale ai le susuga Tuilaepa Lupesoliai Sailele Malielegaoi lea o loo tuuaia ai foi Malele Atofu Paulo ma Lema’i Faioso Sione.
Talu ai e le’i oo atu le faila o le mataupu lenei i luma o taualumaga o le faamasinoga i le Aso Gafua ua tolo ai i le amataga o le vaiaso fou e toe valaau mai.
