Ua aumai i se tulaga faalauaitele e ala i se pepa o faamatalaga mai le aiga o le tamaitai Pule o le TV3 ua maliu, se talosaga i lo tatou atunuu aemaise o fesootaiga i auala faaonapo nei le social media, le taofi o tala faatupu ma tala feaveai o loo laumanuia ai le mafuaaga o le maliu.
Ua faailoa i le pepa o faamatalaga o loo tālia le taotoga faapitoa e faamautu ai le mafuaaga o le maliu, ma e ao ai ona talia lea galuega o le a faatino e se fomai mai Fiti e faia taotoga e saili ai mafuaaga o maliu.
Ua ave ai le faafetai a le aiga o Aotearoa i le toatele ua faaoo atu faamaisega ma upu faamafanafana ma faalototele, i le motusia faafuasei ma se tasi sa pele i le mafutaga i le olaga nei.
O loo faia nei tapenaga a leoleo mo le malaga mai o le fomai faapitoa mai le matagaluega o leoleo i le atunuu o Fiti e faia le taotoga faapitoa, e le gata mo lē sa avea ma pule o le TV3 ae faapea isi tino maliliu e tolu o loo manaomia le faia iai o lea galuega faafomai.
