O le filifilia o ta’ita’ifono o komiti a Fono Faavae mo itumalo e 11 lea e ta’ilua ta’ita’ifono ae faauluulu iai le sui tauva sa finau i le fu’a a le vaega faaupufai o le Faatuatua i le Atua Samoa ua Tasi i le palota tele ia Aokuso o le tausaga ua mavae, e lē o nofo lelei i finagalo o le ta’ita’i ma sui faipule o itumalo palota e 14 o loo lagolagoina le vaega faaupufai e puipuia aiā tatau a tagata.
O le filifilia foi o lē sa avea ma faipule o Faasaleleaga 2 e ta’ita’ifono i le komiti o le Fono Faavae a lea itumalo ae ua faamaonia ona moliaga o solitulafono o faiga faaālatua i le faaaogāina o le 68 afe tālā o tupe o le poloketi miliona ma le faamoemoe e faatosina ai ni tagata palota i le palota tele ua mavae, o se isi lea matāupu e lē o maua iai se to’a o le vaega faaupufai.
Ua taloina e le vaega e le ta’ita’i ma le komiti faafoe o le vaega faaupufai e puipuia aiā tatau a tagata se fonotaga ma sui lagolago o itumalo e 14 o o latou sui faipule o loo i le faafaletui a le patī faapea sui lagolago o itumalo palota e 51, o se faatasiga ua fuafua i le Aso Faraile o le vaiaso a sau le aso 6 o Ianuari e talanoaina ai ia matāupu ma le faamoemoe o le ta’ita’i ma le komiti faafoe o se finagalo autasi o le a maua i lea fonotaga o le a faaaogā i nisi o a latou tapenaga tau faamasinoga.
Ua faailoa e le Palemia susuga Laaulialemalietoa Leuatea Polataivao Fosi i le fono ma tusitala, ua mae’a se latou feiloa’iga ma sui o le itumalo o Faasaleleaga 2 ma ua faailoa ai le tumau o le faai’uga i le avea o lē sa seei i le tofi faipule le afioga Magele Sekati Fiaui ma ta’ita’ifono o le komiti o le latou Fono Faavae.
Ua faailoa e le Palemia ua ave lana fautauaga i sui o le itumalo sa latou feiloa’i e toe foi i fanua e teuteu le lotoifale o vala o loo aafia le latou mafutaga ma lē sa avea ma faipule ona toe feiloa’i ai lea.
Ua lipotia e lē o talia e le itumalo le tauaveina e lē sa faipule o le tofi ta’ita’ifono ona o atugaluga i moliaga ua faamaonia e le faamasinoga o faigāpalota.
