E tele finagalo faaalia i le gaioiga ua faamautu nei e le alii taalo o le tausaga a le lakapi a le lalolagi, le World Rugby Player of the Year i le tausaga talu ai, Ardie Savea lea ua saini i le Moana Pasifika seia mae’a le Ipu o le Lalolagi i le 2027.

Ua lipotia e le RNZ le talitonuga o le Moana Pasifika o le a fesoasoani tele le agai atu o Ardie e sana faamalosia ai le lumanai o le kalapu i le Super Rugby.

E 11 taamilosaga a Ardie i lana kalapu i Ueligitone i le Hurricanes ma ua faailoa e le ta’ita’ifono ma o se tasi foi o tama iloga o le All Blacks, Sir Michael Jones i lea lipoti, o le saini o Savea i le Moana o le a faamalosia ai le ‘au e lē gata i luga o le malaetaalo ae faapea foi i tua mai.

Na saunoa Jones o le Moana Pasifika lava ia e faatatau i le faamoemoe ma avanoa e maua ma o le agai atu o Ardie Savea o le a tuuina ai foi nisi avanoa i isi tama taaalo Pasifika e filifilia ai le Moana e taaalo ai.

O lona uiga la o lea ua iai uma le auso o Julian ma Ardie Savea i le Moana ma o le a tulimata’ia foi e le toatele mo le isi taamilosaga o le a sosoo ai a le Super Rugby Pacific.

Puna o Faamatalaga: https://www.rnz.co.nz/news/sport/522777/sir-michael-jones-savea-signing-legitimises-and-validates-moana-pasifika