O le afi na sasao ane ananafi ma faatama’ia ai clubrooms a le Kalapu Liki a Aukilani i Mt Albert ua faailoa e leoleo, o le afi na tutu e le tagata.
Sasao ane le afi i le nofoaga lea o le kalapu a Malisi i Murray Halberg Park poo le ‘afa o le vaveao ananafi.
Fai mai na pa’ū ai le taualuga o le fale ma ua matuai faaleagaina ma faailoa foi le mafatia o sui o le kalapu ina ua silasila i lea vaaiga i le aso ananafi.
O le faamatalaga a leoleo o loo faagasolo nei le latou suesuega mo le sailia o i latou ua faatinoina lenei gaioiga le alofa.
O le itu faanoanoa e pei ona lomia i le televise tasi ona o se tasi lenei o kalapu ua autausagā, na muai faavae i le 1919 o se vaega tele o le komiuniti i Mt Albert.
O se kalapu na ui atu ai nisi iloga i le taaloga e pei o Sonny Bill Williams, Jerome Ropati ma le alii o Roy Asotasi sa kapeteni i le Kiwis.
Fai mai sui o le kalapu o se tala faanoanoa tele ona o le tele o ata ma faailoga ma mea tāua le kalapu sa iai i totonu o lea nofoaga ua faaleagaina uma.
