O le masina o Oketopa lea o le a talimalo ai le Asosi Siisii U’amea Mamafa a Samoa i le tauvaga siisii uamea mamafa a le Oceania.
O le masina o Me lea na faasalalauina ai e le Failautusi Aoao a le Asosi Siisii a le Oceania Paul Coffa o le tauvaga lenei i le Vaega Laiti, o le tupulaga talavou ma i latou e i lalo ifo o le 23 tausaga ua sifi mai i Samoa nei lenei faamoemoe sa tuupoina mo le atunuu o Cook Islands.
Na ta’ua ai e le Faiaoga o le Au Siisii a Samoa, Afioga Tuaopepe Asiata Jerry Wallwork lenei tauvaga o le a faia i le atunuu.
“A o lei faia lenei tauvaga o le masina o Aokuso lea o le a talimalo ai foi le tatou asosi i le toleniga poo le Ocenaia Elite Training e camp uma ai i latou o le a auai i lenei faamoemoe.
“O le tatou Faletaalo Numera 3 i Tuanaimato lea ua fuafua e faia ai le camp lenei faatasi ai ma le tauvaga lea a le Oceania ia Oketopa ae o le a faailoa i se taimi o i luma le polokalame o lenei faamoemoe pe a mae’a ona faataatitia uma vaega e ao ona tapena iai.
“Mo le tatou ‘au lava ia lea ua leva ona amata toleniga o loo faatino i vaiaso uma lava faalua faatolu ona faia toleniga a le tatou ‘au seia oo lava ia Setema e tapenapena ai foi ia faataunuu manuia taumafaiga a le autaaalo mo le faamoemoe o le a alo atu ai.”
E pei ona faasilasila ai e le asosi siisii a le Oceania o lenei toleniga e ao ina auai ai i latou o loo maualuga le tulaga o lo latou taumafai faatasi ai ma o latou faiaoga i lenei toleniga tele i le masina o Aokuso ma o le a auai ai le Peresitene o le asosi siisii u’amea mamafa i le lalolagi, Mohammed Hasaan Jalood.
Na ta’ua e Tuaopepe o loo iai le faamoemoega e tusa ma le 500 le aofai o le autaaalo faatasi ai ma faiaoga ma sui o le a auai i lenei tauvaga mai atunuu e 22 ma o loo talosagaina le Malo mo se fesoasoani tau seleni ina ia sao ma uli ai lenei faamoemoe tele.
