O Samoa o le a talimalo i le tausaga fou 2025 i le fono o le Pacific Early Childhood Forum poo le fono e aga’i tonu i le tapu’eina o olaga o tupulaga talavou e amata i le taimi ua ulufale ai i a’oa’oga tau amata.

O se fono a atunuu o le Pasefika e auai minisita o le soifua mālōlōina, minisita o a’oga, o le tupe ma le si’osi’omaga.

Ua faailoa e le minisita o tinā ma tamaitai atina’e o afio’aga ma agafesoota’i lea fonotaga tāua auā o ia sa auai i le tasi o fono sa usuia i Fiti i le tausaga na te’a nei.

O le tāua o lea fono faavaomalo ona o le a folasia ai foi mataupu e faasino i le tele o faafitauli ma lu’itau o feagai ma tupulaga talavou o le Pasefika.

O se tasi o taumafaiga a Samoa e lagolago ai i polokalame mo le sa’ilia o fofō i faafitauli o feagai ma tama ma teine talavou o Samoa o se faalauiloa sa faatino e tupulaga e ala i se koneseti sa faia i Savaii i le masina nei o Tesema.

O se koneseti sa faalauiloa ai taumafaiga e tetee atu i fuālaau faasāina ma sauāga.

E iai le talitonuga o se tasi lea o polokalame a Samoa o le a folasia i le fono o le a talimalo ai lo tatou atunuu i le masina o Me o le tausaga a sau.