Ua savali i le lima tausaga o faagasolo galuega ma sailiga tupe o le fausia o le nofoaga muamua mo tagata matutua i le motu o Savaii lea ua faaigoaina o Mapu i Pulotu, ma ua silia i le 2 miliona tala le tau ae o loo tau totogi foi le aitalafu e 300 afe tala.

Ua faailoa e le taitaifono o le komiti o lea galuega le afioga Tuilimu Manuele, e lē taugofie le galuega o loo feagai nei ma le latou komiti ae ua faafetai lava i pisinisi ma kamupani ua agalelei atu faapea le Malo.

O le Aso Faraile ua mavae na tauaao ai e le komiti le foai a le kamupani o le PacificEzy Money Transfer e lima afe tala, ae na faailoa e le taitaifono e lē o se taimi muamua lea ua foai ai lea kamupani i sailiga seleni lava mo le galuega o loo fausia ai le nofoaga o Mapu i Pulotu. 

O le afioga Tuilimu Manuele o le taitaifono o le komiti o le galuega o le nofoaga o Mapu i Pulotu.

O loo faatagisia ai pea le lagolago a le atunuu ma pisinisi ma le Malo i le tau faamae’aina o le galuega lea ua fuafua poo le faaiuga o le tausaga nei ua tino mai le nofoaga lea ua mae’a fausia potu e 40 e faamautu ai tamā ma tina matutua i le motu o Savaii.

O loo iai lava le fuafuaga e toe faaopoopo nisi potu.

O le poloketi lenei o loo taulamua ai le asosi o tama ma teine sa a’oa’oina i le kolisi o Logo i Pulotu lea ua tapunia ae faaaogā le nofoaga e faagaioia ai le Mapu i Pulotu e tausia ai matua tausi e pei o le nofoaga i Mapuifagalele i le motu o Upolu.

E 20 afe le foai tupe a le Malo ua mae’a tauaaoina e le komiti ma o ia seleni e pei ona faailoa e le taitaifono ia Tuilimu ua tuusa’o i le aitalafu o loo tau totogi.

E iai nisi o kamupani ma pisinisi ua tauaao e le komiti a latou fesoasoani tupe, ae o loo tālia pea nisi o a latou tusi aisi ua mae’a faaoo i ofisa o pulega o nisi o kamupani.

O loo faatino foi sailiga seleni a tama ma teine tuai sa aooga i le kolisi o Logo i Pulotu i le faamoemoe lava e fausia lea nofoaga i Salafai.

Mo le silafia ua na o le Ekalesia Katoliko o loo faagaioia ia nofoaga i le atunuu ae e lē o faapito manū ia tasi i tamā ma tina matutua o loo tausia i le nofoaga.

O lona uiga o soo se matua tausi mai ekalesia eseese i le atunuu o loo tausia i Mapuifagalele e faapea foi pe a mae’a le nofoaga o Mapu i Pulotu.