O lea ua faatali se faaiuga a le faamasinoga i talosaga ua tuuina atu e toe ave ai i tua tagi e lua na faaulu e mafua i ni tuuaiga solitulafono o faatosina e mafua i le faaiuga o palota laiti o itumalo faapalota o Falealili No.2 ma Sagaga No.2.
O le Aso Lulu o le vaiaso nei na fofogaina ai nei talosaga ma tāpā ai e le faamasinoga nisi o vaega taua e tatau ona tuuina atu e faamautu ai mafuaaga tonu o le toe talosaga o sui na faauluina tagi e toe faaui i tua.
O nisi o ia vaega na fesiligia ai Loia a itu tagi ma itu tetee o faavae lea o mafuaaga o le toe ave i tua pe faamalieina ai itu na faauluina tagi e leai ni solitulafono faatosina na faia e sui ua aafia i nei mataupu.
O le faaiuga o le palota laititi a Falealili No.2 na fifilia ai Maiava Fuimaono Tito ae o Maulolo Tavita Amosa na manumalo i le palota laititi mo Sagaga No.2.
