Ua tatala i tua le tina o Sivai ae o lona toalua o Sam Fauena o loo nofo taofia pea i le vaaiga a leoleo, a o tapena loia a le ulugalii e tuuina atu se tali i nisi o tuua’iga fou a leoleo faasaga ia Samuelu e pei ona faavae ai le latou tetee e tatala uma i tua ma lona toalua e faatali ai le suesueina o o la moliaga solitulafono i le Faamasinoga Faaitumalo.
O le Aso Faraile na te’a nei na aumai ai le faai’uga o le talosaga apili a le ulugalii na ave i le Faamasinoga Maualuga ma finauina ai e a la loia lo la teena o le faai’uga a le tamaitai faamasino o le Faamasinoga Faaitumalo le afioga Talasa Atoa Saaga, sa lē mafai ona talia ai le la talosaga e tatala i tua.
O le tatala ai o Sivai le toalua o Sam ua faatonuina ai e usitaia aiaiga, e pei o le saini i le ofisa o leoleo e faalua i le vaiaso, ia nofo i Tafaigata faatasi ai ma lana fanau, taofia ona pepa malaga ma le tusifolau, ma ia tapu ona fesootai i molimau a leoleo poo isi tagata o loo molia faatasi i latou.
O lea foi tapu ua aofia ai ma le faaaogāina o upega tafailagi ma fesootaiga televavave faaonaponei le social media.
O Samuelu o le a toe tulai i le amataga o le vaiaso nei i le Faamasinoga Maualuga i taualumaga lava o le la talosaga apili lea o le a tuuina atu e ala ia la loia ni folasaga e tali ai i mau tetee o loo mafua ai ona finau maua’i loia a leoleo e lē tatau ona tatalaina i tua Samuelu.
I le faamasinoga o moliaga o isi tagata e toatolu e aofia ai le leoleo asiasi o Li’o Faataumalama Auava, Lise Marie Schmidt ma Fepuleai Faimata Su’a e pei ona molia faatasi ai ma le ulugalii o Sam ma Sivai, o le Aso Tofi nei i le Faamasinoga Faaitumalo o le a toe valaau ai le mataupu mo le faamautuina o se aso e valaau ai molimau.
Na valaau i le Aso Faraile na te’a nei peitai e lei mautu ai se aso ma toe tolo mai ai i le vaiaso nei e toe tagofia ai.
