Ua na’o ni minute na faatino ai le ifoga a le afioaga o Tafatafa i Falealili ae faaulufale e le afioaga o Lotofaga le faatoesega ma le faamaualaloga e mafua i se tasi o tama o le nuu o Tafatafa ua molia nei e leoleo i lona faao’o le maliu i se taule’ale’a o Lotofaga i le Aso Sa o le vaiaso talu ai. 

O lea gaioiga na faamanu’alia ai nisi taulele’a e to’alua o loo taofia nei i le maota gasegase i Motootua mo togafitiga i ni manu’a tugā mai se agaese. 

O lē foi ua maliu o se manu’a tuga mai lea auupega na fano ai lona soifua. O le ifoga na faatino e pei ona sa molimauina e se faasalalauga a le vaega faasalalau a le Talamua Online na tualuga i fa’aaloaloga faasamoa masani e pei ona sa molimauina e le silia i le $20,000 tala se seleni na maau iai le itumalo ma le afioaga o tafatafa i aiga o lē ua molia e faia ai faaaloaloga faapea foi le tatala ai o ie o le auafa ma moegalafo ona ua magalo le pagota e tusa o tu ma aganuu faasamoa i le va nonofo ai o nuu ma aiga o le atunuu pe a tutupu ni faalavelave matuiā e aafia ai  le ola ma le soifua