O loo faatali le Matagaluega o le Soifua Maloloina i suesuega i Niu Sila e maua tonu ai poo le a le ituaiga vairusi o le faama’i Koviti19 o loo pesia ai nei i le atunuu.
Ua faailoa lea tulaga e le Sui Faatonu Sili o le Matagaluega afioga Tagaloa Dr. Robert Thompson a’o faaaopoopo ai pea le numera o tagata i Samoa ua aafia i le faama’i. O le tuai maua o le taunuuga o ia suesuega ona o loo iai isi vaega taua e pei ona faaalia e le sui faatonu Sili o loo ave iai le faamuamua ai latou o loo feagai ma ia suesuega auā o loo malosi foi le pepesi o le faama’i i Niu Sila.
O se tasi o vaega taua o loo talia nei e le atunuu o le aofaiga o tagata ua aafia ma sa aafia i le siama i le Aso 17 o Mati ua malolosi ma ua le’o aafia i le siama o le faama’i.
Ua faailoa e Tagaloa o loo iai tapenaga o loo feagai nei ma le aufaigaluega , i latou o loo faamaopoopoina lea tulaga ma o loo tausisia foi le taiala ua fai fuafua uma iai le galuega tau faamaumauga o le atoa lea o aso e 10 talu ona maua se tagata i le siama ona faamautū lea poo ua malosi atoatoa mai le toe aafia i le faamai.
