O le masina fou o Aperila o le a amata ona taofia ai i se tulaga lē tumau le toe auina i fafo o tagata faigaluega faavaitaimi i atunuu i fafo ae sei sailiili muamua ma soalaupule ma le Mālō o Ausetalia faafitauli i aiaiga o nisi o galuega e pei ona maua ai ripoti faatatau i ia faaletonu.

O le faaiuga lea a le Kapeneta na faailoa e le Palemia i auala o fesootaiga o le Facebook a le Ofisa Sooupu a le Mālō. 

Faailoa e le Palemia Fiame Naomi Mataafa “Ua manatu ai le Mālō ua aoga foi lea o lea ua faamautinoa ma faamaonia e le Kapeneta ia malaga o Fepuari ma Mati ae sei faagasolo loa le toe mataituina o le polokalame poo a itu muamua lava e tuliloa mataupu ia pei e aliae mai e le’o lelei le faataatiaga o aiaiga o loo faafaigaluega ai o tatou tagata, o le mea muamua a lena e tuliloa.”

Taua foi e le tamaitai Palemia “E tatau loa ona tatou mataituina ina ia lē avea foi le naunau e tuliloa avanoa ae afaina ai le atunuu i tulaga o le atinae ma le faatinoga o auaunaga eseese o lea o loo moomia ai foi o tatou tagata faigaluega.”