O le masina o Iuni o le tausaga nei e atoa iai le 30 tausaga o le faiga paaga faavaomalo a Samoa ma le atunuu o Purtugal poo Potukale, o se malo i le itu i Saute i Sisifo o Europa ae tuaoi ma le atunuu o Sepania, ma e tulata i le vasa Atalani poo le Atlantic Ocean.
O le vaiaso nei na feiloa’i atu ai i le afioga i le Ao o le Malo, le sui filifilia fou o lea Malo mo Samoa o le a ia tauaveina le tofi Amepasa.
Sa tauaao ai ona tusi taualoa o lona tofiga ma e faamautū o ia i Canberra le laumua o le malo Ausetalia.
Faaalia e le sui fou o lea Malo o Amepasa Antonio Moniz o le ta’ua o sootaga o Samoa ma lona atunuu ona o le galulue faatasi i polokalame tau i suiga o le tau, o polokalame o le faasao o atu vasa poo ocean conservation, faapea le lagolago atu i polokalame o le atina’e.
Sa galue Antonio i ofisa o lona malo i nisi o atunuu i Europa e pei o Siamani, a o le’i filifilia e avea ma sui o le malo o Potukale mo Samoa.
