O le vaiaso nei lea na fa’afeiloai ai le Hai Komesina Fou o le Malo o Ausetalia i Samoa le tamaitai ia Emily Joan Luck.
O Emily lea ua sui tulaga nei i lē sa avea ma Hai Komesina i le isi nofoaiga le tamaitai ia Sarah Moriarty.
O le tausaga nei e atoa iai le 50 tausaga o faigapa’aga fa’avaomalo a Ausetalia ma Samoa ma e tele atiane na mafai ona tino mai i lenei faigapa’aga e pei o le fa’amalosia lea o tulaga tau i le saogālēmū, soifua mālōlōina, soifua manuia, a’oa’oga, ta’aloga, aganu’u aemaise o le so’otaga i le va o tagata.
O Ausetalia foi le isi atunu’u lea mai atunuu e tele na fesoasoani mai ia Samoa i vaitaimi o le pipisi o le misela agai luga e ala i fomai fa’apitoa ma tausi soifua na malaga atu i Samoa i lea vaitaimi.
E le gata i lea o Ausetalia lea o loo tele iai sui o le atunuu ua faamanuiaina i avanoa o galuega faavaitaimi lea o loo faagasolo pea faigamalaga ai latou e malaga atu i lea atunuu mo galuega.
Taua e Emily “e fa’aauau pea le galulue so’oso’o tauau o malo e lua ma e tuu mai pea le tauau fesoasoani a Ausetalia i soo se vaega e manaomia e Samoa ae le gata i lea ua saga maua’a ai so’otaga o Malo e lua ona o le tele o vaega eseese na galulue faatasi ai”
O Emily o se ofisa sinia mo galuega i le Matagaluega o le Va i Fafo ma Fetaatauaiga i Ausetalia. E lua tausaga na galue ai o se failautusi muamua o le Hai Komesina o Ausetalia i Port Moresby i Papua Niu Kini mulimuli ane avea ma se failautusi lona lua a le Hai Komesina o Ausetalia i Port of Spain, Trinidad ma Tobago. E umia e Emily ni faailoga tīkerī o mataupu i fesootaiga mai le Iunivesite o Canberra i Ausetalia ma na faauuina mai foi i le Iunivesite o Sini i mataupu o le “Peace and Conflict Studies”.
Ua faaipoipo Emily Joan Luck ma e to’alua lana fanau.
