Ua tali le ta’ita’i o le Itu agai le susuga Tuilaepa L Sailele Malielegaoi, i le tuua’iga a le susuga Papalii Panoa Tavita Moala i lona faaaogā faasolitulafono o ni fasifanua o le NPF e fai ai faailoga o le lūlū a lana aulotu i le silia ma le sefulu tausaga talu ai.
E pei ona faaalia e Papali i le Aso Lulu i se isi feiloa’iga na ia tāloina ai tusitala, na te lē faia le mana’o o o le ta’ita’i o le Itu agai e faatoese ae ua ia faamālūlū i le aulotu Katoliko a Siusega, ona o le ta’ua o le igoa o le ekalesia peitai o Tuila’epa le autu o lana tuua’iga i lona faaaogā o fanua i se auala solitulafono a’o avea ma Minisita o le NPF ma seei foi i le tofi Palemia
Le susuga Tuilaepa L Sailele Malielegaoi ina ua fesiligia i sona finagalo e faasino i le tali a Papalii Panoa Tavita Moala. O loo finau Papalii na faaaogā faasolitulafono fanua i le taimi o Palemia le ta’ita’i o le Itu agai ma avea ma Minisita o le NPF ona sa mana’o e ave fanua e fai ai faailoga o le lūlū ae totogi mulimuli.
E iai le talitonuga o lea tamalii o lona lē faia o le mana’o o le ta’ita’i o le Itu agai a o Palemia na toe faafou ai lana konekarate o le Pule o le NPF mo le na o le tausaga e tasi, ae lē 3 e pei o aiaiga o konekarate o faauluuluga o matagauega ma faalapotopotoga a le Malo. Na ia lu’i lea faa’iuga a le Kapenata ma le Malo i le faamasinoga i lea vaitaimi ae e lei manuia lana finauga.
