O lea ua tauaao e le afioga i le Fofoga Fetalai le tali tusitusia a le Taitai o le Ituagai le susuga Tuilaepa Lupesoliai Sailele Malielegaoi ua talosaga ai ina ia toe sui le taitaifono o le Komiti o le Palemene o loo faia se suesuega i le tulafono o le faamasinoga o Fanua ma Suafa lea na pasia i le tausaga e 2020.

Ua faailoa e le Fofoga Fetalai sona faanoanoaga  i lea mana’o a le susuga ia Tuilaepa ae o lea toeititi maea suesuega a le Komiti ma maua lana ripoti o le a folasia i luma o le Palemene i se taimi e le’o toe mamao. 

Ua faaalia e le Fofoga Fetalai i lana tusi ua tali atu ai i le Taitai o le Ituagai lona teena o lona mana’o e sui le taitaifono lea o loo tauave e sui Fofoga Fetalai. O se vaega o le tusi e faitauina faapenei; 

“O le galuega ua tuuina atu i le Komiti suesue faapitoa a le Palemene sa faavae i le lafo na faamaonia e le Fono Aoao Faitulafono e aofia ai ma sui usufono filifilia iai mo lea galuega. O lea foi galuega ma matuai manino lava la’u folasaga i le maota faapea le saunoaga a le afioga le tamaitai Palemia mo le silafia e le maota ma le atunuu i le agaga na naunautai iai e faatino. E leai ma se agaga e toe faitau mai ni futia ua sola ma le galuega sa faatino e le Komiti sa iloiloina ia tulafono i le paeaiga ua tuanai atu. Ou te malamalama lelei foi i le 2/3 e pei ona e taua, peitai e ese le agaga o loo e aumaia, ese le galuega o loo faatinoina nei.

O sasi foi a le aufaigaluega e pei ona e toe faailoa mai e lē tatau ona e faauigaina o nai mea laiti. Afai ia faatamala lau afioga o lē sa Minisita o le Ofisa o le Fono i le taimi o nei faafitauli e tatau ona aumai lou faatuatuaga i le galuega lelei ma le amiotonu ua faagasolo nei. E leai foi ni auala faapalemene o iai e fōia ai le faafitauli ogaoga ua tulai mai. O lou toe tāua o le suafa o le Sui Fofoga Fetalai i sona finagalo sa faaalia i faatalanoaga faalauaitele ma iloiloga sa faatino e le Komiti na iloiloina nei tulafono i lena paeaiga e tasi lea aiaiga taua sa tatau ona puipui malu iai lena Komiti ma lau afioga ia faalilolilo molimau e tuuina atu i luma o le Komiti Faapalemene e tusa ma aiaiga o tulafono tumau a le Palemene.
O lea foi la ua tau vavala mai sa le’i malu puipuia aiā tatau o tagata lautele na auai atu i taualumaga a lena Komiti mo a latou finagalo faaalia. O le auai atu o le susuga Auapaau Aloitafua Mulipola i le Komiti i lena vaitau e pei ona e tāua o lona lava lena tulaga faatagata lautele a le atunuu. O faiga faatemokarasi moni na, e iai avanoa mo finagalo faaalia a tagata lautele e faufau a’i a tatou tulafono ma tonu fai mo le manuia o le atunuu. E le tatau foi i se sui usufono matua e pei o lau afioga ona e faapea mai “E ‘asa le faiva ae lē ‘asa le masalo” i le alofavaia lea o le

Taitaifono o le Komiti suesue faapitoa a le Palemene. O le galuega tatou te galulue faatasi ma tatalo faatasi iai mo le manuia o Samoa peitai e matau atu e foliga e faamuamua i lou finagalo faiga faavaega faaupufai e saili ai se auala e tilofia ai le galuega fītā a le Komiti o le Palemene lava lea. O soo se mataupu ua iai se faaiuga a le Fono Aoao Faitulafono o tatou uma lava e ana lea faaiuga, e tatau lava foi ona tatou talosia ma tapuaia.

Ou te teena lou faapea mai e sui le taitaifono o le Komiti suesue faapitoa o loo galulue nei i galuega o loo tuuina atu iai e le Palemene. E lē tosina gofie sa’u faaiuga i se mea e lē amiotonu ma e solia ai tulaga aloaia o le Fono Aoao Faitulafono. Ou te ofo foi i lou lē silafia e lē mafai e le Fofoga Fetalai ona sui se faaiuga ua uma na ioe iai le Palemene.

O le tofiga o le taitaifono na faamaonia e le Fono Aoao Faitulafono e na’o le Fono Aoao Faitulafono foi e faia se faaiuga faapea i se mafuaaga tatau ua faamaonia ua tatau ai ona fai. E lē sosofaina foi e sou finagalo toatasi se mea ua ioe ai le Fono Aoao Faitulafono. O itu foi ia e atagia ai le lē tapena o la outou vaega faaupufai i taimi o tatou taualumaga. Afai sa e toesea sa tatau ona outou feutaga’i ma faaleo mai e la outou vaega faaupufai ni finagalo faapea i le aso na faatū ai le lafo peitai toeititi uma le galuega a le Komiti ae o lea faatoa maua lou finagalo. O lou finagalo e faapea e lē agavaa le afioga i le Sui Fofoga Fetalai i le tulaga o le taitaifono o le Komiti suesue faapitoa ou te lē taliaina. I lo’u tulaga o le Fofoga Fetalai e agavaa sui usufono uma i soo se tōfiga e faamaonia e le maota. E augata tele lo’u tagata e fai se faamasinoga sesē e faasinosino lima ai i sui usufono mamalu e faapea o ai ua agavaa a’o ai e lē agavaa. O tofiga uma e mai le Atua, e agavaa uma foi soo se tagata ua tofia ma filifilia e le Atua i soo se tofiga ua ia finagalo iai, ao le tatou tiute e fai faatasi o le tatalo mo soo se valaauina. E lagona ai lava lo’u faanoanoa i saunoaga tau faamata’u a lau afioga e faafefe mai ai le Fofoga Fetalai ma le Palemene i le ono oo atu o lea mataupu i le faamasinoga. O lena ua o’u faamanino atu ae na ona o’u faamanatu atu ua matua lou soifua i upufai o le tatou atunuu o se uiga lē faaaloalo lea tulaga. Sa o’u manatu tele o lau afioga e taulamua i le tausiga o le mamalu o le nofoa ma le Palemene peitai e ese le mea o loo iai lou finagalo. E lē soo a faafefeina foi e se isi le Fofoga Fetalai ma le Palemene le mamalu o le atunuu. O le tuualalo alofa seu le manu ae taga’i i le galu. 

Ma lo’u faaaloalo tele 

Hon Papalii Li’o Taeu Masepau – Fofoga Fetalai 

Ua tuuina atu kopi o lenei tusi i le afioga le

Tamaitai Palemia, o le afioga i le Sui Fofoga Fetalai ma le afioga i le Loia Sili.