O le ‘au ta’ito’afitu a le Manu Samoa o le a tala malae ma le ‘au a Egelani i taaloga lakapi ta’ito’afitu a Malo o le Taupulega i le faai’uga o lenei vaiaso.
E lē faigofie le pulu o loo iai Samoa ona o le isi taaloga e feiloa’i ai ma Niu Sila, ae faamuliga i le taaloga ma Sri Lanka. O le Aso Faraile i Burmingham i Peretania ae o le Aso Toonai i Samoa e tatala ai taaloga a Malo o le Taupulega o le a faagasolo mo le lua vaiaso.
Ua faailoa i se pepa o faamatalaga ua taunuu manuia uma le autaalo a Samoa ma ua faamautu i le nofoaga ua saunia mo autaaalo uma ae o le aso ananafi na faia ai le latou sauniga e sisi ai le tagavai o le Malo Tuto’atasi, ma faia ai foi se faaaliga a le tatou aulakapi ta’ito’afitu o le sivatau a le Manu Samoa, ma saasaa ai foi nisi o taulele’a o le tatou autaalo i le taaloga o le pii ma faalauiloa ai a latou tatau, a o silasila iai le to’atele na molimauina lea faamoemoe.
