Ua iai nei se finagalo o le malo e toe iloilo aiaiga o loo filifilia ai tagata mai le atunuu e maua avanoa i galuega faavaitaimi.
Ua faailoa e le Minisita o Pisinisi Alamanuia ma Leipa o loo iai ma le vaaia o le polokalame o galuega faavaitaimi le tōfā Leatinuu Wayne Sooialo i lona avanoa na tali ai i saunoaga faalauaitele o le tala faaaopopo muamua o le tupe na ia faailoa ai se faamatalaga mai se tasi o tagata faigaluega faavaitaimi ua faailoa atu ai e to’a 20 faiaoga o loo o latou galulue faatasi i nei galuega.
O se tasi lea o vaega sa fesiligia ai pea le Ofisa o loo faafoeina lenei polokalame ona sa molimauina o nisi sa umia galuega i nisi o auaunaga a le malo ma pisinisi tumaoti ae ua faamavae ina ua manuia a latou talosaga mo nei galuega e le gata o ia faafituali ua molimauina e le polokalame ae ua faatuputeleina faafituali ua aafia ai mafutaga a ulugalii ua alu le tasi i ia galuega ae tapuai ai leisi ma le fanau i le aiga i Samoa.
O tulaga ia ua manatu ai le malo e talafeagai ona toe iloilo aiaiga e agavaa ai tagata o le atunuu aemaise lava o tupulaga talavou e leai ni galuega.
Taua e Leatinuu “O le agaga lava ia o le polokalame na iai i le amataga na’o i latou e faimalaga e lē faigaluega ae ia iai le poto masani ae peitai a oo ina omai e faatumu o latou pepa e o i galuega faavaitaimi ua lē faaalia ai o latou e faigaluega ma o latou o loo faafaigaluega i nei Samoa. Ua iai la ma lesi tulaga ua tulai mai ua leai ai ma ni tatou tagata faigaluega e tautuaina le atunuu (Business Community) le au faipisinisi ae lē gata foi i lea ua leai atu ai ma ni aumaga o nuu ma alalafaga o lea ua o uma la i galuega ia faavaitaimi. O lea la ua amata ona toe tilotilo le tatou malo i le taimi lenei e tatau ona toe review poo le a le mafuaaga ua alai ona mafua le tulaga lenei”.
