A o faagasolo ai le sailiiliga a le Komisi su’esu’e o faigapalota i nuu ma afioaga o Itumalo faapalota o le atunuu, o le amatalia o lea su’esu’ega i le vaiaso nei ua faaleo ai lagona o nisi ua mae’a tuuina atu o latou finagalo, ma ave le tuualalo i le komisi ina ia silasila i itumalo palota o loo lesitala ai tagata o loo nofoia eleele o le Malo ma fanua umia sa’oloto, pe afai ae tasi le finagalo o alii ma faipule o nuu mavae e lē palotaina le tofi faipule o le itumalo.

O le itumalo o le Vaimauga Numera Muamua na faaleo ai lea mataupu ma le fautuaga e ao i le komisi ona silasila iai mo se latou fautuaga i le Malo ona o le afioaga o Vailele o loo alala ai nisi o aiga ua faatau o latou fanua i eleele o le Malo ae e lē o i totonu o le faiganuu. O le itumalo o le Vaimauga ma Faleata o loo to’atele ai nisi o le atunuu o loo alala ai i fanua ua faatau motu ae o i latou ia e lē o lavea i le li’o o le faiganuu o loo iai faauluulu i matai o ia afioaga poo alii ma faipule.

O atugaluga sa faaleo i se finagalo o se matai na auai i le sailiiliga a le komisi su’esu’e, o i latou ia e leai so latou leo pe afai ae iai se finagalo o matai o nuu mavae o se itumalo faapalota o le a lē palotaina le tofi faipule ma o se faiga e noatia ai o latou aiātatau i le faia o a latou filifiliga pe afai ua lesitala o ni tagata palota o se itumalo, aemaise ua faamalosia le palota o tagata i nuu ua faamautu ai, e ui o loo iai pea lo latou aiātatau e lesitala ai i nuu o itumalo o loo iai o latou piitaga faaleaiga.

O lola palota o le isi lea mataupu sa lagona ai le tuualalo i le komisi ina ia silasila iai ona e iai lola a nisi itumalo o loo iai pea suafa o tagata ua maliliu, i latou ua malaga i fafo, ma ē ua faamautu i isi nuu e lē o toe palota i ia itumalo. O le tasi o atugaluga ua folasia i luma o le komisi o le iai pea o tagata ua lesitala i lola a nisi itumalo e pei o tagata palota ua aulia le 21 tausaga, ae e lē tatau ona palota ai ona e lē gata e lē o nofo ma faamautu ai, ae leai se piitaga ma e lē o matai ai foi.

O autū o loo agai iai le sailiiliga e faaleo ai folasaga a le mamalu o le atunuu i le komisi, o le tulaga i Lola Palota, Nofoa o Sui Tamaitai i le Palemene, Itumalo Faaleaganuu, Agavaa o Sui Tauva, Resitala o Vaega Faaupufai, Soligatulafono ma Faamasinoga, Palota a tagata Samoa o aumau i atunuu e mamao, Sui o Vaega Faaupufai, Faatulagaina o le Ofisa o Faiga Palota, ma nisi mataupu e faatatau i le Faigapalota Lautele a le atunu ia Aperila o le tausaga na te’a nei, ma le Tulafono o Faigapalota o le tausaga 2019.