A o iai Samoa i lapataiga o timuga mamafa ma fautuaga o uiga louloua o le tau i le Aso Tofi, ma faasolo mai i le faaiuga o lenei vaiaso na molimauina le aafia o feoaiga masani ina ua malosi tafega ma aafia ai nisi o auala tetele i le motu o Savaii.
O ni vaega o auala tetele i Lano ma Saipipi na tafia i le malosi o tafega, ae sa faatino galuega mo le faaleleia o ia auala ma mafai ai ona toe uia e taavale ma tagata lautele.
E leai ni lipoti o ni soifua na aafia poo ni meatotino e pei o fale ma taavale na faaleagaina ona o lologa ma tafega.
O loo tālia se lipoti mai le nofoaga o galuega fesoasoani i taimi o faalavelave faafuasei faalenatura, e iloa tonu ai le tulaga na aafia ai nisi o vaega o le tatou motu o Savaii na aafia i tafega ma lologa.
O le motu o Upolu sa na o timuga na toulu ae leai ni tulaga faapea na tulai mai.
