Fai mai i totonu o aso e lua ae ua lipotia mai ai le aveina e le militeli a Suria o nisi o laueleele i le itu i Mātū o le atunuu sa iai vaegā’au, o Kurdish forces.
Ua faailoa mai o taulaga ma aai i Raqqa ua fāoa, o i sa avea muamua ma laumua o le Islamic State poo le ISIS ma ua ta’ua le oo atu iai o vaegā’au a le militeli a Suria aemaise foi i ona nuu tuaoi.
O le tele foi o le suāuu a le atunuu ua faatonutonu uma nei e le faigāmalo e pei ona faailoa e le CNN ma o le taimi muamua lea ua tupu ai sea tulaga faapea talu mai le silia i le 10 tausaga talu ai.
Ua faailoa e le Peresetene o Suria ua iai se maliega ua taunuu iai feutana’iga ma le vaega a le Kurdish Syrian Democratic Force poo le SDF ina ia faamuta loa fetaua’iga i le itu i Mātū i Sasa’e o le atunuu.
Ua faamaonia mai foi la e le ta’ita’i o le SDF lea maliega ma o le a aveesea mai ai a latou vaegā’au mai ia faaitu ma ia malaga ane ai i Damascus e faatalanoa atili lea maliega ua faia.
O le SDF o loo lagolago iai Amerika ae lē aofia le vaega lea i le autetee lea na o latou faato’ilaloina le faigāmalo a le ta’ita’i sa iai o Suria talu ai, Bashar Al Assad i le 2024.
O le tele o vaega o le atunuu sa faatonutonu lava e le SDF aemaise nofoaga e to’atele ai le ‘au Alapi peita’i ua ta’ua i le lipoti o le to’atele ua toe tetee atu i le SDF.
Faailoa e le Peresetene o loo iai nei o Suria, Ahmad Al Sharaa o le faaletonu o le tau ua vaoia ai se feiloa’iga ma le ta’ita’i o le SDF, Mazloum Abdi ae o le a oo atu lava ina foia matāupu uma e aofia ai le SDF.
Puna o Faamatalaga: https://edition.cnn.com/2026/01/18/middleeast/syria-military-takeover-kurdish-sdf-explainer-intl
