O le tufagā faailoga faaletausaga a le kamupani vaalele a Ausetalia o le Qantas ua amana’ia ai ma le tautua a le kamupani vaalele a lo tatou atunuu le Samoa Airways.
O lea faailoga faavaomalo a le Qantas ua ta’ua o le most improved airport – customer satisfaction award poo le auaunaga ua siitia e faasino i le taulimaina o uta a tagata malaga i le malae vaalele i Faleolo lea o loo pulea ma faagaioia e le aufaigaluega a le Samoa Airways.
Ua faaalia e le ta’ita’ifono o le komiti faatonu o le kamupani vaalele a Samoa le afioga Tupuola Koki Tuala i se fe’au faamanuia i le kamupami vaalele, “Fa’afetai ma vi’ia le Atua i lenei matātia ua ausia ona o lo outou galulue fa’amaoni, galulue fa’atasi, ma le tautua mo le manuia o Samoa ma ona tagata.”
E faapena foi i se finagalo o le Ofisa Sili o le Samoa Airways i le ave o le faafetai ma le faamalo i le pulega o loo gafa ma galuega i le malae vaalele.
E oo lava i le alii pule o galuega a le Qantas i le malae vaalele faavaomalo i Faleolo le susuga Francis Fepuleai ua ia viia le tautua a le kamupani vaalele a le atunuu ona o lea matāti’a maualuga ua ausia.
O le auaunaga lea a le Samoa Airways i Faleolo o loo faatino mo kamupani vaalele o loo afea Samoa i malaga faavaomalo mai lo tatou atunuu.
