O se taaloga na matua faateia ai le toatele ina ua laasia e le alii taalo o Danny Toala le laina sikoa a le Hurricanes i nai sekone o totoe o le taaloga i le faaiuga o le vaiaso ma manumalo ai loa le Moana Pasifika i lana taaloga lona 3 o le taamilosaga o le Super Rugby.
Sa vaaia le finau o au uma e lua mai le amataga o le taaloga i le tau fai la’asia e au e lua o le laina sikoa ma matauina ai le latalata pe tutusa foi o sikoa peitai o sekone mulimuli o le taaloga na fa’aofo ai e le Moana Pasefika le au malosi a le Hurricanes ma manumalo ai i ai e 24 – 19 a le Hurricanes.
E pei ona silafia o le au a le Moana Pasifika o le au a le Iuni Lakapi ua tuufaatasia e faaoga ai alii taaalo eseese mai le Pasefika e pei o Samoa, Tonga ma Fiti. O le taaloga lona tolu lea a le Moana Pasifika mo le tamilosaga a le Super Rugby ma o lana taaloga o le a sosoo ai o le a feiloai ai lea ma le au a le Blues.
O le a faia lea taaloga i le Aso Lua 29 o Mati i le fale taalo a le Mt Smart Stadium, toe sosoo ai lea ma le isi taaloga ma le au lava a le Blues i le Aso Toonai 2 o Aperila 2022. E tele taaloga a le Moana Pasifika o le a sauni atu ai i le isi 2 vaiaso o i luma.
