Le toe iai ni siaki maua fua o le Koviti – E amata atu i le asō ona lē toe iai ni rapid antigen tests e maua fua, ae o lea ua tatau nei ona faatau.
O RATs poo siaki nei na mafai ona maua fua e tagata Niu Sila talu mai le amataga o le 2022, peitai o lea ua lē toe iai nei se maua fua e amata atu i le asō.
Faaopoopo tagata kanesa agavaa i le Keytruda – Ua amata aloa’ia mai le asō ona faatupe e le malo le Keytruda, poo le vailaau e togafitia ma faatelegese ai aafiaga o nisi o kanesa.
O le faatupe ai e le malo o le Keytruda o le a faaopoopo ai ma le fuainumera o tagata Kiwi e agavaa i lenei vailaau, lea sa tele ina faatuatuana’i e le to’atele ona o le taugata tele.
O le Keytruda o lea e tele ina tuuina atu i gasegase e maua i kanesa o loo agavaa i totonu o le ta’i 3 i le ta’i 6 vaiaso.
Aloa’ia mai le asō siitaga o faasalaga mo tagata e paka sese taavale i mobility parks – O le asō foi ua amata aloa’ia ai le siitaga fou o le tau e totogi e avetaavale o loo paka sese a latou taavale i mobility parks.
O lea ua sii mai le $150 sa iai i le $750, e amata faamamalu atu i le asō.
O le siitaga lenei na fai mai ai le minisita o Disability Issues, Louise Upston, e matua’i talafeagai ona o le to’atele o loo faaaogā sese pakaga ua faia faapitoa mo i latou e iai mana’oga faapitoa.
E ese mai i mobility parking, o le asō foi ua suia ai ma parking infringement fees lea ua alu i luga i le 70% e amata mai le asō, towage fees ua faga i luga i le 68% ma le 98% mo storage fees.
Taugata le tau e totogi e tagata asiasi mai i Niu Sila – Ua atili taugata le tau o loo totogi e turisi poo soo se tagata e fia asiasi mai i Niu Sila, a o aloa’ia ai siitaga o le International Visitor Conservation and Tourism Levy mai le asō.
O le levy lenei o le a totogi ai e le to’atele le $100, ua suia mai le $35 sa iai.
E ese mai i lea levy, o le asō foi ua aloa’ia ai tau fou e totogi mo le tele o visa o loo faatalosaga e tagata o loo fia asiasi mai i Niu Sila.
Tatala le avanoa e toe faatalosaga ai peimeni mo le FamilyBoost – E ese mai le lisi o pili totogi ma siitaga o tau o nisi o auaunaga ua aloa’ia mai le asō, o le asō lea foi ua amata avanoa mai ai mo aiga ua agavaa e mafai ai ona toe faatalosaga mo peimeni o le FamilyBoost.
O aiga agavaa nei e oo atu i le $180,000 tupe maua i le tausaga e mafai ona toe faatalosaga le oo atu i le 25% o tupe na faaalu i totonu o le vaiaso mo aoga a fanau o loo ave i aoga amata poo ECE fees, ma o le maualuga e maua e oo atu i le $75 i le vaiaso.
Faamuta le Winter Energy Payment – A o faamuta aloa’ia ai le vaitau mālūlū o lenei tausaga, ua faatofa mai ai foi ma le Winter Energy Payment.
O le peimeni faaopoopo lenei o loo agavaa ai tagata o loo tala penefiti, maua tupe a tagata matutua poo i latou foi o loo maua le Jobseeker Support Student Hardship payment.
Puna o Faamatalaga: October brings changes: The Govt policies taking effect from today (1news.co.nz)
