Ua tatou faitau vaiaso nei ona taunuu lea i le faamanatuina o le Kerisimasi o lenei tausaga, o se vaitau o faiga meaalofa.

O le agaga lea o le agalelei o le kolisi maualuga a le Ekalesia Aso Fitu o le Toe Afio Mai i Aukilani i Niu Sila, ua latou faatupe ai se meaalofa o tanevai e 25 ua tuuina atu mo nisi o aiga o le afio’aga o Samalaeulu i Savaii.

E $80 afe tala le tau atoa o lea agalelei e pei ona faailoa e le tamaitai pule o le kolisi, le afioga Fuamatu Jessie Fuamatu.

Faaalia e le tamaitai pule o se tasi lea o polokalame a le a’oga maualuga e ta’i lua tausaga ma faatino, lea sa fuafua e ave i Vanuatu peitai ina ua iai aafiaga o le kamupani vaalele a lea malo ma faigatā ai tapenaga na suia loa i le aumai i Samoa e pei ona afea ai Samalaeulu.

Le pulea’oga le faletua o Fuamatu Jessie Fuamatu.

O le Aso Sa na toe taliu atu ai i Niu Sila le faigamalaga mai le a’oga maualuga a le Ekalesia Aso Fitu o le Toe Afio Mai i Aukilani.