Ua iai suiga o le a faatino i le tufatufaina o vaegatupe mo le miliona tala lona tolu mo itumalo faapalota e 51 e pei ona iai se faai’uga a le Komiti Faafoe o le poloketi tasi le miliona, o le a faalua ona faamatuu atu vaegatupe.

O lona uiga o le a lē tolu tufatufaga e pei ona sa sau a’i ae na o le lua lea e muamua faamatuu le 700 afe tala, ae faamuliga i le 300 afe e atoa ai le tasi le miliona mo le itumalo.

O le fituselau afe muamua o le aofia ai ma le vaegatupe e 160 afe tala lea e faaalu i le faagaioia o le ofisa, o le lisi o le ofisa o le Fono Faavae ma totogi o tagata faigaluega o le ofisa ma alauni mo sui o le komiti o le Fono Faavae.

E na o le lua itumalo ua mae’a tuuina atu lipoti o le su’eina o tusi o le faaaogāina o le miliona lona lua ma ua talia a latou lipoti ma ua sauni i le miliona lona tolu.

Ae i le miliona lona lua e fitu miliona le vaegatupe e le’i faamatuuina atu ona o le tusi o lipoti a komiti a Fono Faavae a itumalo faapalota e fitu e le’i faamatuuina ni vaegatupe o le miliona lona lua.

O le mafua’aga lea o le talia e le Kapeneta o le fautuaga mai le Komiti Faafoe o le poloketi tasi le miliona, ina ia toe tolo atu i le masina o Ianuari o le tausaga fou e faamae’a ona faamatuu ai tupe o le miliona lona lua, ae ua lē faamutaina ia Tesema e pei ona sa aiaia muamua.