Ua amata nei ona 7 aso e faanofoesea ai pasese e malaga mai fafo ona faatoa tatala lea i tua i o latou aiga pe a fai e manuia uma e leai ni aafiaga o le Koviti-19 se’i vaganā ua aliali mai ai ni auga o le faama’i. 
  
O le faigamalaga mai Aukilani i le Aso Lua o le vaiaso nei na amata ai lea suiga i le aofaiga o aso e faanofoesea ai pasese. Ina ua fesiligia le suia ai o aso e faanofoesea ai na tali le Sui Faatonu Sili o le Matagaluega o le Soifua Maloloina le afioga ia Tagaloa Dr. Robert Thompson…. 
  
“O na ua tou silafia o lea ua i lalo le tatou SOE orders, e pei ona aumai ai foi le faaiuga a le Kapeneta i le 7 aso lea, o lea ua galulue foi le Matagaluega e faatino tulaga e pei ona fautuaina mai ai e le Kapeneta i le me’i mai lea i le 21 aso i le 14 aso ma le 7 aso e amata atu nei i le tatou vaa lea i le asō (Aso Lua) ae faamae’a pea le 14 aso e pei ona iai isi vaa e lua le vaa a Fiti o loo iai i le taimi nei ma le vaa a Niu Sila e pei ona iai i ona tua atu. O le 7 aso la lea o le 7 aso ua uma ona iloilo foi e le Kapeneta ma aumai ai le fautuaga i le vaega lea.” 
  
O le faamalamalamaga lea e le alii fomai o tulaga ua iai suiga o aso faanofoesea ina ua fesiligia e nisi o tusitala i se feilaoiga na faia i le vaiaso nei.