Ua tulai mai nei Anthony Norman Albanese e avea ma Palemia fou o le Malo Ausetalia mo le isi tolu tausaga, ina ua mae’a ai le latou faigapalota tele i le aso ananafi. O le iuga lea o le faiga filifiliga a le atunuu ma ua atoa ai nei ia Albanese le to’a 31 o Palemia o Ausetalia.
O le manumalo ai o Anthony Albanese i le tofi Palemia sa tauaveina e le susuga Scott Morrison, o le manumalo foi lea o le vaega faaupufai a le Labor lea ua ta’ita’ia nei le malo ma o le mutaaga ai foi lea o le pulega Soofaatasi sa tauaveina mai le ta’ita’iga o le malo mo le toetoe sefulu tausaga.
Saunoa le alii Palemia i lona agaga faagaeetia i le manumalo a’ia’i o lana campaign lea e tusa ma le ono vaiaso na tapena ai, ‘o lona faanaunauga ina ia autasia tagata uma o le atunuu. E mananao tagata ia omai faatasi ma saili faatasi mea e lelei ai le atunuu atoa, ia tasi o latou faamoemoega mo se lumanai sili atu ona lelei. Ua lava ia aso ua mavae atu o le fevaevaea’i, ae ua moomia ona autasi le atunuu atoa, ma o lona lena faanaunauga, ia ta’imua o ia i le sailia o lea autasi.’
Sa momoli foi le faafetai a le Palemia fou i le susuga Scott Morrison ona o lona talia ma faamanuiaga foi na faaleo ane e Morrison ina ua manumalo, aemaise foi le amanaia ma faafetaia galuega sa ia faatino a o tulai mai o le Palemia o Ausetalia i le paeaiga talu ai.
Sa lei natia foi e le Palemia fou le amataga mai o lona soifuaga, e lē o se tagata na soifua ane i se siomaga tamaoaiga. Na ia ta’ua o ia na tausi toatasi ane e si ona tina e lei ola ane faatasi ma sona tamā, ma o lona tina sa ola i le penisione mo tagata e iai manaoga faapitoa, ma sa la nonofo i le fale o le malo i Camperdown. O lea na te malamalama i faalogona o le toatele o tagata o si ona atunuu o loo iai i lea tulaga e pei ona sa ia ola a’e ai, o le ala lea o lona naunau ina ia iai se lumanai sili ona lelei mo tagata uma o Ausetalia, ia aua ne’i lafoaia se tasi.
E mataina foi le auala faatamalii na malolo ai le susuga Scott Morrison. Na vave lava ona momoli lana faamalo ma le faafetai i le Palemia fou ua tulai mai, ona sosoo ai lea ma lona liliu ane i lana vaega le Liberals e momoli i ai lana faafetai mo le latou lagolago ia te ia, ae sa faaleo ai foi ma lana faamaulaloga on aua lē taulau lana vaega i le faaauauina o le ta’ita’iga o le malo.
Na faasilasila ai foi e Morrison lana faamavaega mai le ta’ita’ia o le vaega faaupufai a le Liberals, i lona faaseetuagalu mai le tofi ta’ita’i ae o le a iai pea i le palemene e faatino lana lagolagosua i le latou vaega faaupufai mo le isi tolu tausaga, seia aulia le isi faigapalota o le a ia toe finauina ai le toe filifilia o le Liberal e ta’ita’ia le Malo.
Photo of the new Aust PM – Le Pelemia fou o Ausetalia, Anthony Norman Albanese
