Na faaopoopo uma nofoa mo isi pati, ae pa’ū le 31 nofoa a le Labour, ma ua tulai mai ai nei le National.
O le faaiuga lea o le faitauga muamua o le faigāpalota i le Aso Toonai, peitai e iai itumalo o loo fesiligia pea ona o le vavalalata o palota.
O le National lava ia e 39%, e tusa lea ma le 50 nofoa i totonu o le maota.
O le Labour e 26.9%, pe a faaliliu i nofoa o le maota e 34 ma o se pa’ū tele mai le 65 na iai i le paeaiga faatoa uma atu.
O le Green Party, 10.8%, e tusa lea ma le 14 nofoa o le maota.
O le ACT e 9%, ua latou maua ai nofoa e 11.
O le New Zealand First e 6.46%, ma ua toe foi mai i le paeaiga lenei ma nofoa e 8.
Ma le pati a Maori e 2.6%, ua mauaina ai nofoa e 4.
E oo mai anapo e lē o tele se tala mai le taitai o le National, Christopher Luxon poo le Palemia filifilia o Niu Sila, pau o lea e tuua Aukilani i le asō ma faimalaga atu i Ueligitone e faafeiloai sui faipule fou o le pati.
E leai se tala tele mai le taitai o le National ananafi, po ua talanoa i le Act poo le NZ First i le osiga o le isi faigamalo fou ona e na te lē o mauaina le 61 nofoa e tu tasi mai ai, ae na ona fai mai, e lē faia mai i luma o ofisa faasalalau ae o le a talanoa sa’o lava i pati.
I le uma ai o le faigāpalota ma le faitauga muamua, e iai le avanoa e ono toe mamulu ai le isi nofoa o le National poo le faaopoopo foi, ma e moomia ai pea Winston Peters ma lana NZ First.
Ae i itumalo o loo iai i se tulaga ma’ale’ale ma e ono suia pe a uma ona faitau palota faapitoa, e iva lelei ma o Te Atatu lea e muamua ai lava i le lisi, na o le 30 palota o loo sili ai le sui o le National.
I le aotelega o le palota ma le toilalo o le Labour, o le tele o ona itumalo sa faapea e toe manuia mai ai o lea na alu agai i le lanumoana a le National, ma le isi lua agai lana uo, le Greens.
Silia ma le 500,000 palota faapitoa ma o lea ua amata faitau, ma e faatoa faailoa le faitauga aloaia o le faigāpalota tele a Niu Sila i le tolu vaiaso o i luma.
