O le fanau e toalua na maua o laua tino maliliu i le itu i Matu o le atunuu, i Ruakaka i le tusa o le ‘afa o le fitu i le taeao ananafi e faapea mai lipoti, o le tasi tamaiitiiti e na o le tasi lona tausaga a o le isi e 4 tausaga le matua.
O le fale foi na maua ai tino maliliu o le fanau ua mae’a faamaonia mai e le Kainga Ora, o se fale o le malo i Ruakaka.
O Ruakaka e le o se nuu telē, pe ā ma le na o le 2000 tagata i Saute o Whangarei.
I le lipoti a le 1News o lea ua taofia nei e leoleo se tina ona o le mataupu lenei, ma e leai se isi tagata ese o mafaufau iai leoleo.
Mai nisi o molimau faamoemoeina a tala fou e nonofo i Ruakaka, e le o faigofie i le komiuniti lenei faalavelave ona e tele ina masani uma le toatele o tagata, ma o le sau ai o lenei tala faanoanoa ua matuā aafia ai lagona o le toatele.
