A o faagasolo ai pea le galuega a le auaunaga tau soifua maloloina o le faia o tuipuipui o le faamai misela, rubella ma le mummy, ua faailoa e le Faatonu Sili Aoao o le soifua maloloina le susuga Aiono Dr Alec Ekeroma, le faia ai o se suesuega i le mafuaaga o le fano o le ola o se pepe 14 vaiaso le matua ina ua maea ona fai lona tuipuipui i le taeao o le Aso Toonai na tea nei le aso 29 o Aperila.
Ua faailoa e le Faatonu Sili i se pepa o faamatalaga faalauaitele e faapea o suesuega muamua na faamauina ai o le 14 vaiaso o le matua o le pepe lea na faia ai lona tuipuipui e tusa o faamaumauga i le pepa tui.
Poo le ono itula talu ona mae’a ae toe faanatinati atu i le falemai ona ua tigaina tele.
Sa vave tali atu le tausi soifua ma fomai i le faia o togafitiga peitai na uma lava le ola o le pepe.
Ua faailoa foi e le Faatonu Sili i le pepa o faamatalaga, o le pepe ua fano le ola o lona uso masaga sa faia foi lona tuipuipui ae leai ni auga faapea na aafia ai ma o loo malosi.
E faapena foi i isi fanau sa faia o latou tui i le aso lava lea.
Ua faailoa foi e le pulega o le matagaluega o le soifua maloloina o loo iai taiala e mataitu lelei ai le saogalemu o le faia o tuipuipui o fanau, ma o taiala foi ia e faatino ai ni sailiiliga pe a iai ni faalavelave e tulai mai e pei o le tulaga na aafia ai le pepe 14 vaiaso le matua ua maliu.
