O Ie Aso 20 o Iulai o le a suesueina ai e le Pule o Maliu le Coroner le afioga le tamaitai faamasino o le Faamasinoga Faaitumalo le afioga Alalatoa Rosella Papalii le mafuaaga lilo o le fano o le ola o se pepe tama 4 masina le matua o loo masalomia o auga o le faama’i Koviti-19 le mafuaaga o lona maliu.
Talu ai o loo faaauau pea le leai o se fomai e faia taotoga faapitoa e saili ai le mafuaaga tonu o le maliu o le pepe ua faia ai le faaiuga a le tamaitai faamasino o ia foi o le Pule o Maliu e ave loa si alualu toto e teu ae o le suesuega o le a folasia ai molimau a fomai ma leoleo o le a maua ai se faaiuga o le mafuaaga tonu o le maliu o lea pepe 4 masina.
Ua lapatai ai e le Faamasino le fomai o loo faauluulu iai le vaega o togafitiga o ma’i o le fanau iti i le faalavelave lea i le galuega a leoleo ina ua ia faatonuina le ave o le pepe i tua mo ona sauniga mulimuli ona ua faia le faaiuga a le fomai e le’i faamalieina aiaiga o suesuega a leoleo ma le faamasinoga e maua ai le mafuaaga aemaise o loo aiaia i le tulafono o suesuega o maliu lilo e ao ona galulue faatasi le vaega o togafitiga faafomai, leoleo ma le faamasinoga pe afai ae iai ni masalosaloga tatau o le mafuaaga o le maliu.
O le lapataia o le fomai o loo taiulu i le falemai a le fanau e le faamasinoga ua faamanatu iai ma le solitulafono o le faalēmigao i le faamasinoga poo le contempt of court pe afai e lē tausisia aiaiga o le tulafono i mataupu faapea aemaise o le faasalaga o lea solitulafono o le falepuipui poo le sala tupe poo faasalaga uma e lua.
