O loo su’esu’eina nei e leoleo se tagi o se tuua’iga tau soligatulafono faasaga ia Talalelei Pauga lea o loo tatala i tua e faatali le valaauina o molimau a leoleo i lona moliaga o le taupulepule e faaoo le maliu i lē sa avea ma Palemia o le atunuu.
Ua faailoa e le Komesina o leoleo, falepuipui ma le toe fuata’ina o le lafo o ni upu taufaamata’u ua molia ai Talalelei ae o loo faagasolo su’esu’ega i se isi o tuua’iga e faapea sa ia faapāpā se laaumalosi.
E pei ona silafia o Talalelei Pauga na aumai faapagota mai Ausetalia e tali i lona moliaga o le taupulepule e faaoo le maliu, lea e lē o iloa poo afea se aso e su’esu’eina ai lea moliaga e le Faamasinoga Maualuga.
