O le uma ane o aso fiafia, ae amata loa ona le toe maua se ‘ava malosi e pei o le taula i faleoloa e oo mai nei.

Peitai ua faamaonia mai e le Sui Komesina o le Matagaluega o Leoleo le susuga ia Papalii Monalisa Tia’i Keti i le feiloaiga muamua a Tusitala ma le Aufaasalalau i lenei tausaga, le toe faatau ai o ‘ava malosi sa matuai faasā e le Komiti o ‘Ava Malosi ona gaosi ma faatau i totonu o le atunuu.

O se itu na faailoa e le Sui Komesina le faateia ai o le Matagaluega, ma ua faasolo suesuega poo fea tonu lea na sapalai mai ai nei ‘ava malosi.

Na saunoa Papalii, “o loo maualuga le inumia o le Taula Strong, sosoo mai ai ma isi.

Maitauina foi e pei o loo faaaoga lava e le atunuu ‘ava malosi, e pei o le Rice Vodka ma le Rover, e fia iloa poo fea tonu o loo sapalai mai ai.

Ae ua leva ona avatu e le Liquor board le taofia o na ‘ava.”

O le tausaga talu ai ia Aperila na taofia tumau ai e le Komiti o Ava Malosi (Alcohol Control Board) le gaosiaina ma le toe faaulufale mai soo se ‘ava malosi i le ituaiga lea e iai le Boom Vodka, o le Rover ma isi, ina ua maua i suesuega a le Komiti le iai o vailaau e aafia ai le soifua maloloina o tagata, e pei o aafiaga o le mafaufau, ma e leai ni pepa (label) o faamatalaga poo le a tonu le pasene o le ‘ava malosi, ae poo a foi vailaau (ingredients) eseese o loo tuu i totonu o nei ‘ava malosi.

Saunoa Papalii, e lē mafai ona lilo ma natia lenei mea, ua ave foi le faamuamua a le Matagaluega ia i latou ua gafa ma le suesueina o lenei mataupu.