E tolu vaa fagota o le kamupani o le Apia Deep Sea Fishing na faatama’ia i le malaia poo le afi i le faalavelave na tula’i mai i le motu o Savaii a o taula ia vaa fagota i le uafu i Salelologa.
Ua faailoa e le pulega o uafu a Samoa ua i lima nei o leoleo le faalavelave mo su’esu’ega, ae o loo silasila nei le pulega o uafu ma taulaga i ana mea pu’eata i luga o le uafu i Salelologa e ono mafai ona iloa ai se gaioiga na mafua ai le faalavelave.
O le taimi nei ua i lalo nei o le va’aiga a le pulega o uafu ma taulaga, vaa fagota o le Apia Deep Sea Fishing ae ua lē o toe umia e lea kamupani mai Saina.
Faaalia e le Minisita o pulega o uafu ma taulaga i se talanoaga i le Aso Lulu o lenei vaiaso, e tusa ma le 300 afe tala se tupe o loo nofo aitalafu ai lea kamupani i le pulega o uafu le Samoa Ports Authority.
Ua momoli le faafetai a lea auaunaga a le malo i le matagaluega o leoleo, o le vaega o le tineimu ma galuega lavea’i i Savaii faapea le aufaigaluega o le uafu i Salelologa ma le mamalu o lea afio’aga i le galuega sa fesoasoani ai e titina le afi.
