O se tagatupe na maua e se avetaxi i totonu o lana taavale na ia ave i leoleo ma o loo sue ai nei e leoleo le tagata e ana.
O loo lipotia o le tagatupe na maua i le nofoa pito i tua o le taxi poo le taavale laitiiti la’upasese ma ave ai e le avetaxi le tagatupe i le ofisa o leoleo i Melepone.
Fai mai leoleo ua tele valaau ua oo atu i le latou ofisa talu ona faailoa lea tulaga, o nisi ua valaau atu e foliga o lo latou tamā matua e ana le tagatupe ae o isi foi valaau e fai si mamao ese o le nofoaga o loo valaau ane ai ma le vaega sa fealuai ai le taxi.
E le o faailoaina e leoleo le aofai o le tupe o loo i le tagatupe ma o le faamaoniga tonu lea o lē e ana le tupe pei ona faailoa e leoleo.
Latou te fia iloa foi pe o faapefea ona teuina le tupe i totonu o le taga ma faamatala ane uma foliga o le taga ina ia faamaonia ai.
Fai mai leoleo afai e mae’a le tolu masina e lē oo atu le tagata e ana le tagatupe ona toe faafoi lea o le tupe i le tagata na ia mauaina, lona uiga o le avetaxi, na ta’ua e leoleo ua moni ai loa ma le isi alagaupu faaperetania, Honesty is the best policy. Pe i le faasamoa, o le faamaoni lava e aupito sili ona lelei.
