Ua fiafia le alii taalo o le Moana Pasifika, Ereatara Enari i le ‘au poo le team o faiaoga o lana ‘au ua iai i le taimi nei lea e taitaia e le faiaoga ulu o Faalogo Tana Umaga ma a latou tapenaga amata mo le amataina o le Super Rugby o le tausaga nei.
Fai mai Enari e telē le fesoasoani a le team lea mo tama taaalo.
O le faaiuga o le tausaga talu ai sa filifilia ai Faalogo Umaga i le tofi faiaoga ulu e sui tulaga ia Aaron Mauger a o isi o loo fesoasoani ai i le team lea o faiaoga e aofia ai Toaigaotumua Tom Coventry ma Stephen Jones e pei ona lipotia e le leitio faavaomalo a Niu Sila.
Fai mai Enari o le ‘au a le Moana o loo tapena e fefiloi i tama taaalo fou ma i latou ua tele le tomai i le taaloga.
O le home game lona lua a le Moana i le taamilosaga o le tausaga nei e faia i Nukualofa e taaalo ai ma le Highlanders i le aso 4 o Me.
O le uluai home game a le Moana i le tausaga talu ai sa faia i Samoa.
