Ua soloatoa nei i le falepuipui le alii o Tyson Brown faatoa mafai ona talosaga mo le palola pe a mae’a ona tuli se 15 tausaga i le falepuipui ona o le faaoo o le oti i le teineititi e na o le lua tausaga o Arapera Fia i le 2021.
O le faasalaga lea ua tuuina ane e le faamasinoga i le mataupu lenei sa tulituliloa foi e talafou talu lona faatoa tulai mai.
O le teineititi o Arapera na uma lona ola i le falemai o tamaiti i Aukilani i le aso 1 o Novema 2021, i le mae’a lea ona maua atu i se tuatusi i Weymouth o loo iai ni manu’aga.
Na molia ai Brown i le fasioti tagata i le taimi lea ae ua ta’ua i le lipoti a le One News o se tasi tamaitai e le o mafai ona faailoa le igoa sa ia ioeina foi moliaga o le fasioti tagata paivalea ae lei lauina i le asō lona faasalaga.
O le faamasinoga maualuga i Aukilani na fofogaina ai le iuga o le mataupu lea, ua lipotia na matuai faatumulia i le taaeo analeila.
