E iai le talitonuga ua taofia nei le siakiina o taavale uma e ulufale i le malaevaalele i Faleolo e mafua i se faai’uga a le pulega o malaevaalele, lea sa amata faatino i le Aso Gafua ua mavae.
O se faai’uga sa fesiligia ai e nisi aiaiga faaletulafono e agavaa ai ona faatino e le vaega o le puipuiga o le saogalemu a le malaevaalele lea gaioiga, ma mafua ai se fonotaga a le Komesina o leoleo ma le Loia Sili i le Aso Gafua na te’a nei sa auai ma le faauluuluga o le pulega o malaevaalele.
O le lomiga a le nusipepa o le Sunday Samoan o loo faailoa ai se vaega o le tusi a le Loia Sili sa tuuina atu i le faauluuluga o le pulega o malaevaalele, o loo faailoa ai e solitulafono le latou faai’uga ma e ono aafia ai le malo i ni mataupu tau faamasinoga.
