E le o taimi uma e maua ai se vaaiga faapea. E moni ua tele nisi fanau ua tulai mai e tauave le taleni sa muai lauiloa ai foi o latou tuaa aemaise lava i fanau tama i o latou tamā, peitai pe atonu o se taimi muamua lea ua tulai mai ai lenei matati’a o le faiaoga o le tamā i le ‘au ae o loo taalo ai ma sona atalii.
O le Manu Samoa taitoafitu o loo malaga nei mo lana taamilosaga e pei ona auai atu i le vae i Sini i Ausetalia, 27-29 Ianuari 2023, ua maua mai i lipoti o le a taalo ai mo le uluai taimi le alo o le susuga i le alii faiaoga, Muliagatele Brian Lima, lona atalii ulumatua le alii o Brian Junior poo BJ Lima.
O le sauniga na faapaia ai e Fr Maurice T. Thomson jersey o le ‘au i le po anapo ma tufatufa atu e se tasi foi o sui tuai o le Manu Samoa i le tulaga o le prop, le susuga Nua Tavita Sio, o loo pue mai ai le ata o le alii o BJ i lona jersey Numera 16.
O le asō lea na muai amata ai le taamilosaga i Sini ma na manumalo ai le Manu Samoa i le la taaloga mata’ina ma le ‘au a Aialani i ‘ai e 17 le Manu Samoa i le 12 a Aialani.
O le a sauni atu le Manu e taalo ma le ‘au malosi a le USA i le 11.22am.
O le alii o BJ Lima, o le alo ulumatua a le alii faiaoga, le afioga Muliagatele Brian Lima ma le faletua ia Lemalu Sina Retzlaff.
E toatele ua faaali o latou finagalo fiafia ma faamalo, aemaise ai le tulimata’ia o le olaga taalo o lenei atalii ua amatalia, a o faaata ai e le toatele le taimi a o tulai mai foi lona tuaa i lona soifua taalo i le Manu Samoa, lea na tele ni matatia maoa’e na faatuina ai e lenei foi tamafanau a Samoa i le malosi o lana taalo i le ‘au a le atunuu.
O le maugagana faaperetania, “Like Father Like Son” ae o le maugagana faasamoa, “E solisoli mulivae le atalii i le tamā”.
