Pe ā ma le 19 itula talu ona sola ese ma le falepuipui i Tanumalala le pagota o Lauititi Tualima, ae faataalise mai le faasalalauga a le matagaluega o leoleo, falepuipui ma le toe fuata’ina e talosagaina ai se fesoasoani a le atunuu mo le toe sa’ilia o lea alii pagota.
Faaalia e le matagaluega i lana faasalalauga pe o le fitu o le afiafi o le Aso Lulu na sola ese ai Lauititi o se pagota o loo tuli lona faasalaga i solitulafono e pei o le toso teine, faomea, talepe fale ma le gaoi o le faaoo manu’a tugā ma le sola ese ma le falepuipui.
O lea pagota e pei ona silafia sa logologoā ona tala i le lalolagi ina ua ia faamalosi se tamaitai tulisi sa malaga tafafao mai i Samoa ma lana uo tama i le tausaga e 2015, o se solitulafono na tupu a o sola foi i tua ma le falepuipui lea sa i Tafaigata.
A o tuli ai lona faasalaga e 18 tausaga mai lea solitulafono sa toe molia foi e leoleo i le talepe fale ina ua la osofa’i ma nisi pagota na sosola i tua i le tausaga e 2020 se faleoloa o se faipisinisi mai Saina.
E tele tausaga o loo nofosala ai lea taulealea ona o ia solitulafono sa faamaonia, peitai o lea foi ua sola i tua.
E lē o faailoaina e leoleo pe na faapefea ona saofia le sola’aga a Lauititi, ae o le isi pagota na sola talu ai nei ae ua toe maua, na avanoa ona alu ese ma le falepuipui ina ua o e fafai mai fuālaau’aina mo meaai a pagota i le faato’aga ei fafo mai o le pa sima maualuga ma uaea maama’ai o loo si’o ai le lotoā o le falepuipui.
O se solitulafono matuiā le faalafi e se tagata o se pagota ua sola mai le falepuipui ae o loo tuli le faasalaga aemaise le faalafi o se tagata o loo mana’omia e leoleo mo a latou su’esu’ega.
