Ua faaiuina le tauvaga o fagotaga poo faigafaiva faavaomalo a Samoa sa faagasolo i le vaiaso atoa ua mavae atu nei, ma ua sola ai le aufagogota a le auvaa o le Yellowfin sa taitaia e le afioga Samoa Roy Lee o se tasi o faipisinisi i Samoa, ae o se tamalii foi e fiafia tele i faigafaiva i ogasami loloto.
O le taitai o le Malo le afioga i le Palemia na ia tauaaoina atu faailoga mo aufagogota na mau tulaga ina ua lau togi o le tauvaga i le faaiuga o le vaiaso na tea nei.
I le faailoaina lautele ai o le faaiuga o le tauvaga, o le Yellowfin ua siamupini, tulaga lua ma le tolu aufaifaiva o vaafagota o le Fu’a II ma le Reel Cat, ae o le aufagogota mai Amerika Samoa le Anite Pier ma le Double Trouble na faamanuiaina i le tulaga 4 ma le 5.
O le siamupini o le tauvaga faigafaiva faavaomalo le Yellowfin ua agavaa nei e fai ma sui o Samoa i le tauvaga faigafaiva faavaomalo e faia i le tausaga fou i le atunuu o Costa Rica.
Faaalia e le taitai o le aufaifaiva ia Samoa Roy Lee o le manumalo ma le siamupini o lana aufaifaiva ua faaaloalo ai i ona tuaa ua fai i lagi le folauga, o nisi sa tutū malosi e lagolago lona auai i tauvaga ua tuanai.
