Ua faamaonia le solitulafono a se tamā Aukilani na ia faia faasolitulafono le silia ma le 900 Warrant of Fitness o taavale a tagata.
O Brett Wayne Robinson o lea na ave e le Waka Kotahi i le tulafono ona o lona faaaogaina faaalatua o le lesitala ua ta’ua o le Motor Vehicle Register e na te faia ai warrant of fitness o taavale ma i le faamatalaina o lenei solitulafono, o se uluai taimi lea ua faia ai e se tasi se mea faapea.
O Robinson e lei faigaluega muamua mo le Waka Kotahi peitai o lea na ia faaaogaina faamaumauga a se tasi o tagata sa faigaluega muamua, ae e le o toe faigaluega mo le pulega.
Ae mo le silia ma le 900 lea e anaina taavale sa faia e Robinson warrant of fitness, o lea ua faaleaoga uma e le Waka Kotahi ma ua sau ai ma le faatonuga ua tatau ona toe agai i se isi inisia ese e toe siaki ai taavale.
O le faasalaga ua aumai e le faamasinoga mo Robinson o le tuli o faasalaga mo le valu masina e faia lea i lona aiga ma ua faatonuina foi e na te totogia se faasalaga tupe.
