O lea ua faailoa i faamaumauga lata mai a le Matāgaluega o Tinā ma Tama’ita’i, Atina’e o Afio’aga ma Aga Fesoota’i o loo vaaia le poloketi o le atina’e manuia o itumalo faapalota, ua 11 miliona 150 afe ma le 850 tālā ($11,150,850) ua mae’a ona tufaina o le fesoasoani o le toe a’e o a’oga.
Ua faailoa ia faamaumauga a o lipotia ai le faatali pea o tagata o nisi o itumalo faapalota tetele i le Vaimauga ma Faleata e le’i maua ni a latou ta’i 150 tālā.
O se isi lea o tulaga ua molimauina talu ona lolofi le to’atele e lesitala i lola palota a itumalo i le fia maua o lea fesoasoani ua faaopoopo ai ma le numela o lola palota.
I le silia ma le 11 miliona tālā ua mae’a ona tufaina o faamaumauga mai le Matāgaluega o Tinā ma Tama’ita’i, Atina’e o Afio’aga ma Aga Fesoota’i ua faailoa ai ua 74 afe 339 tagata ua oo iai le fesoasoani.
O fanauiti i le vaega o a’oga amata ua maua latou seleni e 9,469, fanau i a’oga tulagalua i le va o le 5 ma le 12 tausaga le matutua ua maua a latou ta’i 150 tālā e 16,981, fanau i le va o le 13 ma le 16 tausaga e 10,472, tupulaga talavou i le va o le 19 ma le ma le 24 tausaga e 6,013, o le isi tupulaga talavou i le matutua mai le 25 i le 34 tausaga e 8,113, o le au tino i matutua i le va o le 35 ma le 44 tausaga e 6,805, o le au matutua mai le 45 tausaga e oo i le 64 e 11,970, ma e ua aulia tausaga penisione e 65 ma sili atu e 4,516 ua maua le fesoasoani tupe o le toe a’e o a’oga.
Ua tasi le afe ma le 57 tagata e iai aafiaga tumau ua maua foi lea fesoasoani.
O le tolu masina o lumana’i nei mai a Aperila e oo i le faai’uga o Iuni e mae’a ai ona faamatuu atu lea fesoasoani tupe mai le malo.
