Tusia: Maina Misa Foma’i – Vai
Mai le aso 22 o Mati seia oo mai i le aso 23 o ananafi lea ua faamaonia mai le siitia ai o le numera o tagata ua maua i le Vairusi o le Koviti19 i le atunu’u i le 622 talu mai le aso 17 o Mati, 2022. E tusa ma le 155 le numera o tagata fou ua aafia i le koviti i totonu o le 24 itula ua mavae.
Ua lipotia e 16 tagata ua aafia i Savaii, ae 606 ua aafia i Upolu nei, e lei iai lava se tasi ua aafia mai Manono ma Apolima. E le o iai se tasi ua faataotolia i potu tigaina (ICU) ona o ni auga tuga o le Koviti.
E na’o le toafa lava i latou o loo vaaia ai auga o le faama’i ma o loo faanofoesea i totonu o le falemai o Tupua Tamasese Meaole i Motootua.
E 48 tagata ua faamaonia mai ua aafia i le Koviti mai tuaoi faavaomalo talu mai Novema o le tausaga ua mavae.
O i latou mai le 15 tausaga e oo atu i le 35 tausaga o loo lilifa iai le maualuga o le pasene o e aafia i le faama’i i totonu o Samoa.
