Tusia: Maina Vai
O le tulaga lea na faailoa mai e le Minisita o Leoleo ma Falepuipui ma le Toefuataina ia Faualo Tauiliili Lefau Harry Schuster, mulimuli ane ai tuuina mai se pepa o faamatalaga na tuufaatasia e le Malo o Samoa faapea Ausetalia i le tulaga ua oo iai le Vaa Leoleo o le Gataifale le Nafanua II.
Ua faamanino mai le maua i suesuega ma taumafaiga ina ua oo atu le vaa i Cairns Ausetalia e matua sili atu le tupe manaomia e toe faalelei ai le nai lo le tau o se va’a fou. E manino le tulaga faanoanoa i lo tatou malo faapea foi le malo na alolofa mai e ala i le foai mai o le vaa lenei tusa ma le 30 miliona tala le tau, mo le puipuiga o gataifale o lo tatou atunuu i le mea na tupu, ina ua faafuaseia ai ona faaleagaina le Nafanua II ia Aokuso o le tausaga ua mavae.
O loo faagasaolo i le taimi nei talanoaga, ma ua tautino Ausetalia e le aveesea ai lona lagolago mai pea o le paaga lelei mo Samoa faapea atumotu o le Pasefika, i tulaga nei tau le puipuiga o le gataifale. Ua silafia e le atunuu le tulaga na tulai ai le faalavelave na mafua ai ona faaleagaina le Sa o Leoleo mo le puipuiga o le gataifale, ina ua malaga atu i Salafai i le tausaga ua mavae e momoli atu malu o le malo mo puipuiga, i ni vevesi sa tulai mai i le motu tele,a’o agai atu le solo taavale a le Vaega faaupufai o le HRPP e taamilo i Salafai.
O le sauni ai o le vaa o le a toe taliu mai na pa’ulia ai loa i le aau i Salelologa, ma na ripotia e le i iai se tulaga faaleagaina o le siosiomaga e ala i le gataifale na pa’ulia ai le Nafanua II.
