A o tālia ai nei se filifiliga o se Komesina fou o le Matagaluega o Leoleo Falepuipui, ma le Ola Toe Fuata’ina, o le Aso Lulu na faia ai i le hall a le Ekalesia Agelikana i Malifa se sauniga faaleoleo mo le faalauiloaina o Malu o le Malo i le vasega o alii ma tamaitai ua faamanuiaina i le siitia o o latou tulaga faaleoleo poo Police ranks.
Ua faailoa e le sui Komesina le susuga Auapa’au Logoitino Filipo e 41 Malu o le Malo ua siitia o latou tulaga e aofia ai se leoleo satini sinia ua maua le tulaga faaleoleo o le Inspector poo le Leoleo asiasi, faapea foi nisi o leoleo ua siitia mai le tulaga satini i le satini sinia.
E 32 Malu o le Malo ua maua le tulaga faaleoleo o le ta’ai lua poo le Corporal. Faaalia e Auapa’au o tulaga faaleoleo ua avanoa ona o nisi ua faamavae ma nisi foi ua faamuta a latou auaunaga ua agavaa ai i latou ua siitia tulaga i le galuega faaleoleo.
E lē gata i lea na ta’ua e le sui komesina o loo lava seleni o loo totoe o le tausaga faaletupe o le a mae’a i le faai’uga o le masina nei e faatupe ai totogi o tulaga faaleoleo o i latou ua faamanuaiina i tulaga ua siitia iai.
