Ua faamauina i fuainumera lata mai o tagata i Samoa ua maua i le faama’i, le siitia ai nei i le 11,313 le aofaiga o i latou ua aafia, ina ua lipotia lea e le soifua maloloina talu mai le Aso Lua ua mavae, le aafia ai o tagata e 268. Talu mai le aso 10 o Me, e to’afā gasegase na taofia i le falema’i i Motootua mo togafitiga ona o āuga o le faama’i.
O faamaumauga lata mai foi ia ua faailoa ai le faaopoopo o le isi soifua ua fano i le faama’i o se tina 59 tausaga o le soifua, e iai ona gasegase tumau, ae le’i faia se tuipuipui o le korona vairusi poo le Koviti-19. Ua siitia ai nei le aofaiga o ē ua maliliu i le faama’i i Samoa i le 24.
Ua faaalia e le Matagaluega o Soifua Maloloina, o i latou ua faitauina i ē ua maliliu ona o le faama’i, ua mae’a ma mautinoa ia latou faamaumauga ma suesuega, e fesootai ma āuga o le Koviti-19. E iai foi maliu na lesitalaina peitai e leai ni sootaga o mafuaaga o le fano o latou soifua ma le faama’i.
