Na suipi le ‘au pasiketipolo a tamaitai i lalo o le 16 tausaga le matutua i le taamilosaga FIBA Under16 Womens Asia Championship Division B.
O le ‘au a Samoa na su’e siamupini ma le ‘au a Syria i le Ipu autu ma o se talaoga finau tele, o le kuata mulimuli o le taaloga na maua ai ‘ai faaopoopo a Samoa ona o se sala i le ‘au a Syria.
Na vaaia le mata’ina o le taumafaiga a le ‘au a tamaitai U16 a le atunuu i lea taamilosaga atoa ma na maua le avanoa o Samoa i le Ipu autu ina ua o latou faato’ilalo le ‘au malosi a Filipaina i ‘ai e 88 i le 73.
O lea taamilosaga sa faatautaia i Amman i Jordan ma na amata mai i le vaiaso na te’a nei ma ua faai’uina i le aso ananafi.
